KOTAVA
Kotava rundawer kene enundepera va olegara va arafa tamefa golerava novesa, keve tuwavaveem,
pu kot ayik ke minafa winta da in sinton drikon rogoler.
Staren Fetcey, tel redusik, va nelkaf nyapes ovakeem stayas art redura va Kotava wonar.
PULVIROPA IS MAMOPA
Kotava digir va mamopaf is pulviraf bolk belcon opelapaf is nustapaf.
Abava doplekur va 24 eltay, kot vadjes va tanoy solwif mamolk. 5 kirn is 17 rol is 2 kirnrol.
Kotava zo sotiyar dum zo suter ise meka divzawara.
Luxe pulviraf bolk in tir drekirapaf is ovarotapaf, grustayan moe tel abic kotlizef tamef nelkot. Batdume gan bettan zo roraver.
STAAVEEM
Kare belcon tamef is popaf is rotowas tison opelaf is drikon roradan is rofosan nustaf envakseem kotrafa Kotava al zo gestar.
Abic nelkotap va in dred ise askid da kulackafa is plaxanyafa xeka tir.
NASBARA
Maletiks va vayarafa is kobarafa is tolbunturafa jontika tanda Kotava tir.
Mali winugafa redura bak 1978, konaka rigotafa towara al sokid.
SUTEROTEEM
Tamavaf suteroteem tir cugunaykafa kiewega, itaya dem yon narmaf grabom
vrutas va ayafa norluca is sinafa suterava. Tan bitonaf mukot ke bato xo
tir da va kotarayaf sin loote atoer.
Valeveon, tigid vexala dem suterotikany ke dan grabomkalkotavaks krulded.
Kotavafa tanizva ke kot suterotik dere kotviele tigir.
Suterotafa kotavaxa dere zo atoed.
KALKOTAVAKS SE
Jontik kalkotavaks krulded. Yon pulotaf krent is yon amidaf malnariks ikz-.
Valeveon, konak kalkotavaks geltrayan gan Staren Fetcey is konak tozaf kotavusik.
Dere rin, me klabul ise drageson va intyon kalkotavaks webel acum va cugunaykaf rotegisaceem
ke Kotava batinde danedil.
TELIZ YO
Valeveon jontika gluyaxa stasa kal teliz icde Kotava. Keve winugaf pulviropak, jontik amidaf uum
isu watsaca al mukotad va pintakiraf pebuks is sebuks gan miv Staren Fetcey ik bewik ke Kotavaneda.
Amidafi dulapafi webesiki dere zo atoed.
Adim, konak felateliz.
KOTAVA --> FRANCAVA RAVLEMEEM
Lo 29 000 zaeya va kotavaf ravlemeem batvielon ponad.
Ota verton tugijawer kapbure warzaf ayatrakuraf muxasaceem is minaf seltolegareem.
Male bat zaeyeem ronazbat va konak vuntoy nyan ravlem (okon tamefa dantenaca,
tuke indaf osteem) ik ponan trogarn (kare verteem ta ponara ik joara).
Va yona xantafa (okon taneodafa) zaeya kotavaf ravlemeem abavon atoer.
Kota taneodafa zaeya (kramtukaludevkirafa) va tanoya rapa oku kuparki tadler. Zaeya sudon awir.
Loon yavaf indaf nyan ravlem (blafotaludevkiraf) bifoton radimeon ferenon awid.
Aze valeveon, ede tid, toleodafa zaeya (okon titickafa dantenaca, ritaludevkirafa),
miv ronyasa va intyona indafa dantenaca.
Grayafa zaeya zo vuesteyed bene intaf taneaf amulaf ilkom (zawe yon meilkomaf gray bene bareaf).
FRANCAVA --> KOTAVA RAVLEMAK
Koe ravlemak mon 29 000 francavaf ravlem isu muxaks is intaf kalkotavaks re bonjawed.
Ota verton tugijawer kapbure warzaf ayatrakuraf muxasaceem is minaf seltolegareem.
Va francavafa giltafa abavuca ravlemak tarkar.
Kot ravlem tir tanoy vexalolk koe dan gedraf sugdalaf ik muxas maletiks rotid,
kot bat digis va tanoy amidaf kalkotavaks. Bat valeveon ferenon bam awid.
Kot taneodaf vexalolk tir kramtukaludevkiraf volse toleodaf maletiks tid blafotaludevkiraf.
GLUYASIKI SE
Valeveon jontika gluyaxa stasa kal yono kotavafo ok kotavuso internetxo, kotlize koe tame.
Rin dere trasitil va yona gluyaxa kal yono xadolafo ik avopafo internetxo lize bibera icde
Kotava is walvedeyaf goleraveem en zo ruecked.
Adim, yona gluyaxa stasa kal yono amidafo dulapafo divefo internetxo.
Me klabul da pu cin sugdalal ede beti direfa gluyaxa kal rolafe ok voltise mane co star.
RAVERA
Valeveon va kaliafa raveranuva va kotavaf omaveem di trasil, ton 20 azazon gokosmana abdufisa ravera.
Va 4 pak bata ravera tantar :
- Yona verta : pintara va yona pulviropafa verta ruena koe watsa
- Yona ksubera : konaka ksubera kapbure raverawatsa
- Yon ravlem : yon ravlem isu trogarn ruen koe ksubera
- Yona dulzera : vixara va ksuberadulzereem.
PRILARAK
Valeveon tid konak giltaprilarakam, watson is flidekson grustanaf.
Va lodabdufa avaravera bat prilarak denon me ikad voxe noved da va jontik omavaf ravlem isu blayak
isu debala kalion giltavel.
Kot prilarak tir baravaf : Kotava is Francava is ara ava.
| |
Langue universelle |
Plan du site |
Recommander le site |
Contact |
