Wole Soyinka koe Abeokuta koe lentetaltefa Nigeria al koblir. In al vayar koe Ibadan kotla az Leeds englafa kotla lize bak 1973 al zo dobayar. Koe Engla in tevdon ugalzeyer; satcon tiyir wenhusik koe Royal Court Theatre ke London bak 1958-1959. Arti tanda ko Nigeria in dimpiyir aze taveyer va wenha is suteroteem koe Ibadan kotla az Lagos kotla az Ife kotla lize kereler va taveraplay ta dolunhen suteroteem. Bak 1960 va "The 1960 Masks" taneaf wenhamilk in al redur aze bak 1964 va "1964 Orisun Theatre Company" ar, torion va intafa wenhaxa se warzer ise wetce wenhusik dere paker.

Bal nigeriafa koegeja, koe felolk ta lhumarazavzara Soyinka muxaweyer. Bak 1967 in bam zo soper, kaganon va vlepera do biafraf tcumivikeem, acum bak riwe tolda flinton zo kagir. Va riwe tol-sanoy suterot Soyinka al piskur : va se warzot is pizasuterot is ezla. In englavon suter ise kan ravlemupura intafa suterotura adalawer

Dum wenhusik, Soyinka satcon al zo turestar gan eireaf J.M. Synge, vexe aotcer va sanefa prostewafa afrikafa wenhura ke dana tid stutera is melza is zatcezara. Va vundeem ke yoruba sane (va Ogun lorik ke azil is geja) in nelkon malgruper. Bal intafa ugalzera koe London va taneafa wenhaxa se al suter : va "The Swamp Dwellers" is "The Lion and the Jewel" dana koe Ibadan al zo redud aze bak 1963 al piskud. Azon, inaf ar suterotanh se tid : "The Trial of Brother Jero" (1963) is "A Dance of the Forests" (1963) is "Kongi's Harvest" (1967) is  "Madmen and Specialists" (1971). Vanmiae intaf trakopaceem : "The Strong Breed" (1963) is  "The Road" (1965)  is "Death and the King's Horseman" (1975). "The Man Died: Prison Notes" (1972) is "Aké" (1981) tid mivizvanhaf suterot se.

Bak 1986 va Nobel Poradro Wole Soyinka al kazawar.