Aleksandr Sergeyevitc Puckin tir xantoc ke savsoluafa yasa vey gadikye is ke abisiniafe sersikye (« tele Ebeltikye ke Gijaf Piotr ») vey gadikya. Dene gadikeem va francafa gaara kazawar abdi da ko Tsarskoye Selo ginafa olda zo doster.

Va flibik koe Divexo elda in zo koplayar, ixam tison kotgrupaf wetce sutesik va foktafa ezla yo, aze bardon ugalzer koe Sankt-Peterburg lize stier va dekabraf seltom yo ise va rekodafa is perzafa blira jupar. Bakon, va "Ruslan is Lyudmila" alaakafa ezla (1820) suter. Golde blokxa malhedana dum askevmadasa gan ginaf ardial, koe geefa Rossia koe Ekaterinburg az Kicinev az Odessa (1823) in zo divblir.

Koyara ko Kavkaz is Krima, is kosmara va Byron, is listilu ke ronhasen patctoy se, va "Flintik ke Kavkaz" (1821) is "Baxtcisaray Sul" (1823) is "Tsiganik se" (1824) inafa nhabafa ezla yo koswad. Bak 1824, mal Odessa ko Mixailovskoye yasaf pilkot eninteno sokexo in zo stakser, lize di antion vols mewemton toldon ugalzer.

Tison enuzes va rossiafa tawa, va konak blokreiz ("Nulin Biptik", is "Monama koe Kolomna") in bokar ise va alaakafa ezla yo suter ise va tela taneafa vedeyafa piza "Boris Godunov" bunher (sanegatana bak 1831). Bak 1826 gan Nikolay I^-eaf warzaf ginik Puckin zo emnagar vexe ware zo tutubizar ise zo eninter. Inaf tanoy zolonaf grabom bak bati olhastewesi bliraki tir " Poltava" alaakafa ezla (1828).

Bak 1830, ugalzera koe Boldino yasaf pilkot nover da in tolgalter va sutelara va blokberpot "Evgeni Onegin" sanegatan bak 1833. Tuke bat berpot sol teza yo ke abdiugal is turestilu ke Byron va int ten tunuyar. Dere bak 1830 va konaka "folvama",  vanmiae dana tid "Mozart is Salieri" is "Ridolaf Okoldik", is "Reiz yo ke Berkin" ("Westara " is "Warfokdolesik" is "Piuteokilik" ikz-) warzot se suter.

Bak 1831 va Natalia Gontcarova in kurer. Tison bozakirapaf ise turkon kosaf gu anamefa skudjera se, koe zivolaf is skaltaf alpoz ke aboyikeem vligus va inafu norlilu daletoe di blir. Konak inaf grot batsareon wori evlad : "Iyekotaf Okolik" ezla (1833), is "Dicimafe Sersikye" (1834) kotgrupaf warzot lize geltrilueva is tacukilu kalaotcewed, is "Nasbeikya ke Redakik" (1836) berpotam koswayan gan kevmadara ke Pugatcev.

Bak 1837 yoke bakara bal toldoalie kev Georges d’Anthès francaf jotaf oluik in awalker. Feliik ke warzot, is taneaskisik va piza is izvaberpot, is norlaf ikapulvisik va rossiafa gloga, is merodolunhen ezlik, Puckin va koti suterotoxi en al tcalar ise va yanbamuxaxo al tulomantar.

Inaf nelkaf vanbureks rotir al tir redura va opelaf is liaf is tamaf warzaf avot. Va gijilu ke inafa ezlafa cora, is va melzapilu ke blokeem, is va mergilrabudilu ta pimtara is tiavera, is va tolredura va bli kan yanba dere setiket. Vanmiae rossiavaf suterotikeem, Puckin lanon tir tel loon turestayas va kotaf vedeyaf suteroteem. Neke, sedme intaf muxaks, va " opelaca yo " anton opelon djukaliyir.