Bak 1809 koe Boston Edgar Allan Poe ve kobliyir. Va intafe gadikye me ve grupeyer, va David Poe glabik is wenhusikaj is ruyatakolik dan koe New York ve griawiyir aze golde kotcakola moion ve awalkeyer. Elizabeth Hopkins inafa gadikya, nasbeik ke londonaf wenhusik se, gemelton ve wenhumuyur. Golde kotcakola va intafa tolsanbalemdafa gadikya bardamaf jotaf Edgar ve drapuyur. Gan Allan se ve zo nareyer ; meviele winugon di zo vanikatcuyur vexe va Allan yolt radime yoltega kotviele di bendeyer. Va savsafa Engla in taneon ve kosmayar. Wetce olaxaparloesik is dere langemelton levetirikparloesik, koe Scota az London Allan Weltik arientayar. Bak 1820 dimpiyison koe Richmond koe Virginia Edgar ve tiyir grupaf is jebes is oden ravesik : utifa is bemafa kiewatca yo (francavuson is latinuson is ellasuson). Va intafa anda intotcilu is lanu blipolesilu tcalayad. Vewayason va unera koe gadikyefo parloexo, in ve vanpiyir wenhusik koe Boston az sayakik bak 1827 vilteson kan Edgar Allan Perry yolt.

Va "Metzengerstein" taneaf reiz in ve suteyer, koe dan rorabatera ixam tir da va eaftilu ke tacedaxo ko jilaxo gruparburer. Bak 1829 Allan Weltikya albapana gan yik ve awalkeyer. Bak 1830 ko Westpoint sayakabema in ve zo dosteyer. " Al Aaraaf" inafa alkafa is lazavudafa ezla ke dana gradilik tir kanik wale kelt is kusto su zo piskuyur. Arti tanda kou West Point golde  "frayepesilu" is "volgda" in zo aloyayar. Bam toz uliyir. Inaf nikeem azu tanizvikeem di trakuyud da va ulira mewetceon vols golde kefa ilamsiskesa keska yo is inafi polavandiliraroti albayar. Va sanegara va lan suteks yo in ve kiewaskiyir. Bak 1836 va intafa kosayikya Virginia ve kureyer, tuke nik vruzason ruyeyes da tiyir tolsantandafa beka anton en sanbalemdafa. Va piskura va reiz yo is ezla se in ve linveyer ise  koe konake pone se koe Baltimore az New York az Philadelphia ve dokobayar. Bak 1840 "The Narrative of Arthur Gordon Pym" az "Tales of Grotesque and Arabesque" zo sanegad.

Gazik ke kobulara, va lana intafa suteyena rupa se in gariilukoron ve aspiskuyur. Trumilu zilinu pu inafa nega se suteyena kan taneaf ilkom is jontika vestafa pinta is elimafa evla se pu inafa rupa se va jonte merofolisa ageltaca yo kristeyed da jontik belisik ve zo buiveyed da tiyid gariaca yo. Bak 1841 va sutelaraneda ke Graham’s Magazine in ve koayar, va dane in ve koebelgapayar acum mal 5000 kal 25000 duulenik virda ve tulogijaweyer. Bak bata tanda va Dupin in ve reduyur, va mekonjeson undes trasisik, va swavaf gadik ke Sherlock Holmes gan Arthur Conan Doyle. Bak 1842, tir toza ke kotcakola ke inafa kurenikya. Poe ve trenayar da suter ise koe ulidebaxo se tuizkawer. Arti tanda va "Razama" milugalon sanegana koe konake pone ve suteyer acum koe vo is milon Engla intafu sposilu di exoneweyer. Bak 1847 Virginia ve awalkeyer. In ware suteyer ise va intaf ezleem beliyir ise laxayar. Inafu salilu roataleweyer, in loloon uliyir ise va int malayar ise volpokolesiludeoneyer. Koe nuda ke Baltimore in meblif ve zo trasiyir. Arti balemoy viel ba 07/10/1849 in ve awalkeyer.