Awalkera ke inaf gadik, dritik, viele in tiyir pestdaf, ko volfakafa erbadebala va kotafa yasa ke jotaf Emile plekur. Viele va inkewera ko Paris inafa gadikya gorar, va sakiafa blira Emile Zola kosmar : « wawilu koe Paris, di kaliyir, tir jontolafu wawilu ». Bata xokagafa debala is rodjera ta ekul is taneafa kobara koe piskurind az play ke suterotaf ugaldusik va in di stayad van viltesa sutera. Tori geltrilueva is rozayana tuwaveva sutesik va Germinal kaliapon di sayudar : « Minaf gradilik, Zola suter, mea tir karaf ormusik, tel soloksik ke XVIII^-eafa decemda. In tir altoopaf detcik ke toelafa opa, tisik tazukayan kan vila se ise perdoes koe anameda va int kotbartivon kolusa ». Tuke mana ruyera, varze malhopara se Zola va int divykayar. Me di gracayad. Pu in Nietzsche tizon ve dulzeyer : erava ke Zola, tir « alitaratci ». Dere va Dostoyevski ta pomara in me ve rozinulayar : «Va Zola al belí volse va mana evakaca anton volfakapon al robelí…»

Acum dam Jean d’Ormesson al suter : « Kaike bata malhopara se, gijilu ke Zola tir da ko intaf cugexaf grabom va « riwe kotaf milsaref grupenilusok » al kobelcar, sedme tazukoy ke Michel Serres, ise da ko bata granapafa kobara va uilt se ke gaderopafu is seltafu bagaliilu prekson urlijkeyenu koe felind is moekote va gorukafa bodara ke peztakevafa sukera is alaakafi rali » al vanburer.

Ke Emile Zola vundaf kolnaks zavzar : Rougon Macquart se, « tuwavafa is seltafa izva ke yasa bak Toleaf Imugal ».

Aze moni blitena, icde arpeo ke Dreyfus, va kotgrupafa dilfura Emile Zola ve kabuyur : Isti 90^-eaf tandeem konaka tanda tiyid adrafa ta da icde bato arpeo inafa trakula iaweyer. Aze mal pawera kal kevmadawera in di pir. Mali da in miniakiraf da Dreyfus redakik tir volgunaf, ba 11/01/1898, koe Aurore fela, pu Sokasanetaneatisik va intafa taulesa twa ve piskur : Numá. Pu in va datafu gijayoltilu kalion di vanburer ise va lanhara is zersara di vodar, veblagason va intafa divbliwera.

Ko France bak 1899 in di dimlapir aze bardon di awalker, tison 62^-daf, golde vimtawera, koe ware bulafa walta.