Emily Brontë, kobliyis bak 1818, tir nasbeikya ke Patrick Brontë partik. Dum intafa berikya se, va grivapa tori sutera wavepon exaksar ise va int gesiason do Anne tela lojotafa va Gondal gestafo gazaxo redur. Loon dam beta berikya, va Haworth yasamona is anamefa vayka Emily en skeweson suver : batlize, dum gradilikeem ke intaf tanoy berpot, koe govitafa tuwava abrotcibartivon ugalzer. Tison 17^-daf, ko Roe Head School va Charlotte dositar. Vexe kire va divblira en levgajar, ko partaxo kalipon di dimpir.

Ara yovara va jonvielera koe Law Hill School nover da kosmar va ageltafa izva ke Sam Stead jotaf gadikiskik, dan pu in va tela ke gradilik ke "Wuthering Heights" koswatar. Koe Law Hill, ta vulkura va aldoasa anameda, va ezla se suter. Azon koe Haworth balemdon ugalzer abdi da ko Bruxelles va Charlotte dositar. Moi awalkera ke sinafa ziavikya, ko Haworth tenon dimpir. Bak 1845, va inaf nubasuteks va ezleem Charlotte kosmar ise pu Emily va finera ta sanegara soltiolter. Bak 1848, tandon arti sanegara va intaf berpot, golde kotcakola Emily Brontë awalker, vewayason va kota selaropafa tcicera

Intaf tanoy berpot "Wuthering Heights" (dodeson sanegayan bak 1847 yoltoe Ellis Bell) va kiewatcanha war milon ede me tir lion dam "Jane Eyre" tel miltandon sanegayan gan inafa Charlotte berikya. Katcalaf kan suterafor is remaynustilu is ilkapafa berpotevaca turestayana gan tela germanafa, in fereon al zo dolunher do ellasafa ok shakespearafa folva yoke intafu noilu. Vexe enkagrupesilu titir gavefu ise norlilu ke Emily Brontë afton tudenaweter anton moni tena ke XIX^-da.