Koe Alcalá de Henares (lentrone Madrid) bak 1547 Miguel de Cervantes Saavedra koblir. Nasbeik ke wawaf selaropik ise levgas va krabesa blira ke intafe gadikye, va vertafa vayara in me onkar. Soe nuvelar da va Alcala kotla az Salamanca kotla in nobar.

Belirasken, in tir mivraves. Mon bak 1568 va intaf taneaf blok se in suter, icde awalkera ke Elisabeth de Valois, toelafa kurenikya ke rayik ke España Felipe II. Vexe anton tid vazafa yawara se, ise Cervantes koe arpoeba taneon ektuwer. Bak 1569, koe Roma va yasapa joawesa va Papik in kozanir. Va Italia exuler ise belison va pulukaf is milugalaf italiaf suterusik yo va intafa suterotafa ravera tukotrar. Bak 1571 va Lepante totameld kev Turkik se in paker, viele va taltefa nuba drapur, aszilitison va "nubiskik ke Lepante" toriyolt. Arti balemda, dimlapison va España, gan tcordik se ke Barbaria (Lentefa Afrika) Cervantes zo gulder aze ko Aljazaira ta gralomenilu zo star, keson da kev inafa tunuyara paxay di zo doder. Bak alubda in baton zavzar flintaf.

Wali 1582 is 1585 koe sutera in nelkon ektuwer. Ton mefolisu kaliilu, va ezla yo is drunta se dana riwe kota kotvielon al griawid bam warzer. Tuke Galatea tawadayberpot tugrupenawer, beka kan bruxa meblison. Bak 1584 va int kurer. Lanugale koykakik, gan rictaga luxe erbabutcara zo uculer acum kontomon zo koflintar.

Koe Sevilla az Madrid, in fordon is olon jadion remblir, vexe pu intafu suterotafu norlilu va kulaf ugot batcoba dafur. Bak 1605 taneafa pakava ke "El Ingenioso Hidalgo Don Quijote de la Mancha" awir ise va kiewatcapa seotar, vexe golde baroya tcordafa piskura kodoleyena koe Madrid arti toloya saftama moi awira ke xanto pu in munstenser.

Bak 1615 va toleafa pakava ke "Don Quijote" in sanegar, kaiki toloy ar suterot, "Tulaf Warzot se" (1613) is "Koyara ko Parnassos" (1614). Adim, balemoy viel abdi awalkera va yronokaf berpot "Kobara se ke Persiles is Sigismunda", va tacukaf is purdaf berpot ke okolarpolia, in tenur. Ba 23/04/1616 koe Madrid awalker.