Luís Vaz de Camões koe Lisboa bak 1525 lanon al koblir. In tir nasbeik ke Simão Vaz de Camões, oluazanisik koe Gazaxe pasus va galiciaxantafa yasa, is Ana de Sá Macedo kou Santarem. Icde inafu jotilu abiccoba zo gruper. Yoke inafa pulukafa araya, zo seriur da koe Coimbra kotla in al lanon vayar. Bak 1547  ko Magriba wetce sayakik in mallapir. Batlize va roneita in drasur. Kaiki dimlapira ko Lisboa, in sakion blir. Bak 1552, larde va Gazaxeoluazanisik al bakayar, in zo koflintar. Divflintayan ba 13/05/1553 arti sanoy viel ta Roneka in kototawer.

Wali 1556 is 1560, koe Macao in soker aze va Moluka tursia worar aze koe Kwantung jonvieler. Kene Kamputcea bopelawer, porfe, artlapison va Goa tapedon landume zo koflintar, aze arti tolda ok barda zo tunuyar. Mali 1564, va dendara ke dom Antão de Noronha warzaf ikagazik in impavantar. Bak 1567 va dimkoyara van Lisboa bokar. Radimi abrotcifa soktara koe Mozambika, ba 07/04/1570, ko Lisboa erbiskapon artlapir. Remi koyara va Os Lusiadas intaf vartaf kind in al suter aze bak 1572 koe Lisboa vaon rubiar. Pu Sebastião jotaf gazik va bat tarizar acum ganon zo kser turwimi novetesi da kali awalkera in moron di blir. Inaf suteroteem dam bat kind loon tir. Va wenhaceem is ezleem askis da in tir ezlikanh ke intafe sare Camões dere al warzer.

Ba notrara va intafo vo gan España in awalker. Nekev intaf abdumimaks ke Parnassos, va ara ropiskutuna ezla yo Camões me iskeyer.