Charlotte Brontë
(1816 - 1855)
Englavaf berpotik |
![](../images/CBronte.jpg) |
Charlotte Brontë
vanmiae lokotaskiweyes englavaf berpotik se batvielon zo
torigir.
Koe wida
poke Haworth koblir, lize inafe gadikye Patrick Brontë
tir partik. Bak 1821 inafa gadikya awalker. Ta sopura va
gaara va intaf nasbeikyeem, Patrick Brontë vaon kosuter
koe irubarabema tori partikafa nasbeikya lize bligropa
tir maneke virnafa da tela toloya loklaafa berikya kan
kotcakola awalked. Charlotte kotbliron ganon zo tcalatar
(koe Jane Eyre va intafa bagala se divrozatar) ise vanpir
taneanasbalik ke balemoy moblis nasbeik. Tel ar tid
Branwell is Emily is Anne. Daletoe gan intafa gadikyafa
ziavikya nasbeikeem zo gaatar.
Charlotte is Branwell
berikye mopoyed va noafa suterotafa dokobara aname Angria
gestafa patcta ise warzed va jontika nega isu wenhaxa isu
pone isu eltayamkirafa ezla. Azon Charlotte, djuvanpiyise
tavesik, ko dugafa irubarabema zo stakser lize do Ellen
Nussey is Mary Taylor di tunawenhar.
Inafa ebafa toza tir
volfakafa. Vebena gan suterolegara, in flecur va sopura
va fli ke tavesik koe intafa savsafa irubarabema az dene
pilkotik se.
Undeson va redura va
intafa yikyafa irubarabema, in gorar da divpatcton
mallapir ta tukotrara va intafu avafu grupesilu. Bak 1842
do Emily intafa berikya ko Bruxelles lapir, ko
irubarabema gadena gan Heger weltikya. Va rictela ke
grupelaf is katcalaf gaaropik Heger kurenikye tolevgar.
Awalkera ke sinafa ziavikya va toloya berikya steger da
dimpid ko Haworth lize Emily gorar da tenon titickawer.
Charlotte den Heger se tolpir, wetce englavaf tavesik koe
sinafa tcema. Loloon dustulenon gan Heger weltikye, va
swavopafa deonapa levgar acum gorar da dimpir ko Engla.
Jontik aksat di tid adraf ta da golde bata keluyuna
skedanha kariwawer.
Konviele, bak 1845, va
kselt yo ke Emily Charlotte xuyavon kosmar. Baalpenon gan
sinafa duga, pu intaf berikyeem drager va sanegara va
donafa karba piskutuna kan "Poems by Currer, Ellis and
Acton Bell" vergumvelt bak 1846. Va berpot se baroya
berikya bam tozud.
Tel ke
Anne, "Agnes Grey", is tel ke Emily, "Wuthering
Heights", gan piskusik zo naled, vexe me tel ke Charlotte,
"The Professor".
Kevoke, inaf toleaf berpot,
"Jane Eyre",
piskun bak 1847 yoltoe Currer Bell bifredur. Konolesaca
va prostewa ke “gothic” berpot, bata taneilkomafa nega va
lantan bilitar golde ruyera va inte is elvilu ke
gradilikya (isti victoriafa rekola) vexe inaf kulupaf
martig, skeweraf is kotunon felilen, askitir da titir
gulapaca. Va
"Shirley" bareaf berpot bam mopoyer.
Branwell inafe berikye,
turuyatakolaweyene is puiltfamafe, bak muvugal 1848 golde
kotcakola awalker. Arti abica safta, fentaroteyeson is
medjuropeyenon Emily dere mulufter. Anne inafa ironokafa
berikya golde milafa akola bak 1849 siluon xonukar.
Tori
Charlotte bam tir toza ke tozelaca.
Lhumason va virnafa
filtewesaca, va "Shirley"
soe tenuker. Wori inafa zida daletoe tulomantawer larde
va tarkara va yoltiskilu ixeyenu pu Emily me govebar. Do
intaf milebik, satcon Elizabeth Gaskell intaf enidaf
tanizvusik, va delafa suterotafa naca yo bam webokar.
"Shirley" golde
suteragropa se al mejer. Toloya gradilikya artazukawed
ton turietavaf delt ke berikyeem ke Charlotte, ise nega
tanion darunter wale seltafa geltrilueva is berpoteva
lodoviskafa vols libuivesa dam tela ke
"Jane Eyre". Kevoke,
"Villette", sanegan bak
1853 is omavan moe bruxellesafa bagala se gan jontiktan
zo torigir dum inaf grot.
Bak 1854 va Arthur
Bell Nicholls partik Charlotte kurer, nekev tsunera ke
intafe gadikye. Va kurerafu kalapilu sin gruped. Sol bate
sare trindig se zavzad vrutas da va are berpotdetce
Charlotte aneyayar.
Volkalon,
genasbalason Charlotte tuakolawer aze ba 31/03/1855 awalker.
|
Suterot se ke
Charlotte Brontë |
|
|
Jane Eyre
(1847) |
Shirley (1849) |
Villette (1853) |
The Professor (1857) |
|
|
|
|
|