Amuzena is tigisa giva koe konaka loma zo pulad :

• Tazukindafa giva : ord is volveyord is zae is zaeya is kasafa osta. Sina me zo gobetad, nemon zo rotuvarad ede rokla awir. Milinde icde “Mamtiyara” wimna. Loon jadion kota ra tigisa koe kona elega varone bu me co zo gobetad.

• Tentuks. Batcoba tir tela loon derokafa giva icde jontik ravlem. To tel loon abdukaf luz tir nume zo gotuvarar. Ravlem va konaka sugdala rodikir numen sina zo gowaltrakud, sotre tanoya conya mu kota. Vangrupeteson va diotera, va yasa bu malsavel !!
  Kota tentusa conya va febafa tazukoyera di gotarkar, ozeteson va tantazukuca ke belca az rosoputuson va yona gedrafa givavuropafa askira tukulatasa va origak favlaf gu kotafa doda.
  Ledamon, tanoya conya tir kotirkayana is guvlardayana. Va blayaku (.) gu tentuks nemon gonikaplekutul aze tuenatal. Ede konaka solwifa sugdala num konaka gocenkatana conya, va nuok ke taneafa conya fiste malsutetel aze milinde tuvaratal. Akz-.

• Malavaks va mon tol-sanoya avapa. Konak ravlem va vexalapa dem stragayan malavaks ixam dadid, tezon gu gotarkana atoera isu abavafa vura. Loplekutuson va warzaf vadjeks, va yasa bu malsavel !!

• Skedaks. Gamdara sopuyuna koe origak va milsugdalaca is aryon skedan trogarn icde jontik ravlem ixam al rotcaluted nume al stragad. Va tuvarara me klabul !!

• Ozwaks : Va kobarapa kayestasa va kotavaxa is rotuvon gamdasa gu konak origak daned. Acke me maltegil !! Voxe va konakar ozwaks ( kimacka tir aluba ) roloplekul ede malyedal da batcoba tir ebokafa isen ozwan sutesik sotir vuestexa, omavackason va tazukoyesa teza arlize savena.

• Katcalaks. Kottan roweber ede tce trakur da miwara va askiks ik unera ik muxara ik sugdalackafa towara icde ravlem tir favlaca. Kotviele trumason va givasa duga is skudason va tavesa is nedisa duga.

• Gluyaxa va jlayesu bu koe titak. Vaxe denafa rokla, me zo gobetad.