Kiavá.
Bata wafra tir dulapepesa, kan kevus nelkot. Batkane va sugdala ke konak vegungaf ravlem davon rododisuket. Mu kontan metis kotavus ozodik, bata xekinda tir favlapafa. Grewá.
Voxe batcoba kal bibera va tentura va jin star. Kot ravlem va pilkafa sugdala nudadir, vox meviele tela mila ke kona vegungaca. Tulon, venta is kesi va tanoya ok toloya amidaca dadid, ede gildacká :
- ruxeem : aala is luca dene venta vols kesi ;
- debala : antiafa dene kesi vols venta (cwe).
Jinafa bibera : toklizu cotcera va bata amiduca ? Toktan al gorar ise sedme tokyona luda ?
— Troubadour 28/08/2015 09:02

Kiavá,
Gue, bata dolunesa vanfirinda kan wafra dem vegungaca va jontika dulapera nedir nume trakú da vaon co gotubolkat kire batcoba va sapafa besara va yono varafo sugdalaxo nover, tarkason va aludevafa ovopaca.

Luxe rinyona elimafa bibera, jinon plekun tentuks tire zo romalyopad ise zo rotuelimad oke dace zo rokevkalid, voxe va batyon askiks isu nelkot altogí :
- mali to barsanda kotavú nume, memoranson, tí tan usikany ;
- to konak ind tid lize fotí stinackaf, tulon dene tel ke tawavopaf trogarneem ;
- dene Avaneda, va ravlemaf uumeem apton viunsú ;
tentuks is kalavaks va taneodaf kotavaf ravlem gitid nyudamafa xuta tuelimana is kimana gan favera is yona tula trasina kou suteroteem ik vuestesa kotavaxa ;
- abdida va kon pintas tentuks bendé ( tulon va tel ke venta oku kesi ), koaneyapá nume en va wafra dem kruldes vegungaf ravlem is milsugdalaca exoné ;
- azon, kot ravlem va pilkafo sugdalaxo godadir ;
- kare ind, tentuks di tir loleon elimaf ik solkatcas ;
- neke moekote, va rigotaf nelkoteem ke Kotava latarká, ise tan olkoy cugeke gotir rodaxara va sugdalafa regrara male gadava. Nume ede kimara va sugdala va tela ke Francava ok Englava me vadjed, pune batcoba riwe kiewaxe tir. Darpe ugal, Kotava va intafa belira va agelte al sodaskir ;
- adim, ise va batcoba zornarsá, konaka kerdela va jinafa pilkafa remgrupera num titickara va rieta malfid ledame va vuesteks al trasí. Ostik batcoba tir tana loon seramafa kerdela ke Kotava : rotira va turestara va belira va yon tamavolk.

Ton batcoba kaliyina, arse kota dokalira zo rofenkur, nume ede trakul da lana coba di zo gobetad, rokeyakset. Omava gotid vugafa grupera va Kotava, is tarkara va inaf omaveem isu swava, is nuvakirafa kobara, is gruadafa telduca.
To batcoba. Grewá.
— Daniel Frot 28/08/2015 11:38

Va rin gu kota pintasa dulzera isu pebura grewapá.
Voxe belison va sina, warzafa bibera artfir : kas dene Kotava kotunafa milsugdalaca rokrulded, trabe ravlem tagelton besas va milo sugdalaxo, oke kas vugeke amidacama en gotir ?

— Troubadour 28/08/2015 22:53